ملڪي آمدني وڌائڻ کانسواءِ قرض نه ٿا لاهي سگهون: وزيراعظم

APP06-020921 ISLAMABAD: September 02 - Prime Minister Imran Khan addresses at the ground breaking ceremony of Sialkot-Kharian Motorway. APP

اسلام آباد – 02 – سيپٽمبر (اي پي پي) وزيراعظم عمران خان چيو آهي ته ملڪي آمدني وڌائڻ کانسواءِ قرض نه ٿا لاهي سگهون، سياحت ۽ صنعتن جي فروغ تي خاص ڌيان ڏئي رهيا آهيون، ڪاروبار ۾ آسانيون پيدا ڪرڻ اسان جي ترجيح آهي، پبلڪ پرائيويٽ پارٽنرشپ سان ترقياتي فنڊز جي بچت ٿيندي، پبلڪ پرائيويٽ پارٽنرشپ جي راهه ۾ ايندڙ رڪاوٽون ختم ڪيون وينديون، اڳوڻن دورن ۾ ٺهندڙ موٽرويز جو ملڪ کي وڌيڪ فائدو نه ٿيو، هر منصوبو شروع ڪرڻ وقت ملڪي مفاد کي نظر ۾ رکڻ گهرجي، اڳوڻي دور کان هيستائين ٽيڻ تي وڌيڪ رستا ٺاهي چڪا آهيون، هاڻي رستن جي ڪميشن سان لنڊن ۾ فليٽس خريد نه ڪيا ويندا، سيالڪوٽ – کاريان موٽروي سان سفر جو وقت گهٽ ٿيڻ سان گڏوگڏ صنعتي سرگرمين کي پڻ فروغ ملندو. هن اهڙن خيالن جو اظهار سيالڪوٽ – کاريان موٽروي جي پيڙهه جو پٿر رکڻ واري تقريب کي خطاب ڪندي ڪيو. اطلاعات ۽ نشريات وارو وفاقي وزير چوڌري فواد حسين۽ مواصلات وارو وفاقي وزير مراد سعيد پڻ تقريب ۾ موجود هئا. وزيراعظم چيو ته پبلڪ پرائيويٽ پارٽنرشپ تحت منصوبن جي شروعات هڪ نئين سوچ آهي، ترقياتي فنڊز اسڪولن، اسپتالن ۽ ٻين منصوبن تي خرچ ڪيا وڃن ٿا پر فنڊز محدود هجڻ جي ڪري ترقي به محدود ٿئي ٿي. هن چيو ته سيالڪوٽ – کاريان موٽروي انتهائي اهم منصوبو آهي ڇو ته ان علائقي ۾ صنعتي سرگرمين جي فروغ جي تمام گهڻي گنجائش آهي، گوجرانوالا، گجرات، وزيرآباد ۽ سيالڪوٽ ۾ صنعتن کي فروغ ڏئي سگهجي ٿو، صنعتي سرگرمين سان ئي آمدني ۾ اضافو ڪري سگهجي ٿو، جيستائين آمدني ۾ اضافو نه ٿيندو قرض نه ٿا لاهي سگهجن، صنعتي سرگرمين جي فروغ لاءِ سهولتون ڏيڻ گهرجن. وزيراعظم چيو ته وڌيڪ آبادي جي ڪري هن علائقي جي اهميت وڌيڪ آهي ۽ هي موٽروي صنعتي علائقن مان گذرندي، پبلڪ پرائيويٽ پارٽنرشپ جي راهه ۾ ايندڙ رڪاوٽن کي ختم ڪنداسين، موجوده حڪومت ڪاروبار ۾ آسانيون پيدا ڪرڻ تي زور ڏئي رهي آهي، ننڍي ۽ وچولي درجي جا ڪاروبار معيشت ۾ ڪرنگهي جي هڏي جي حيثيت رکن ٿا، ان ۾ به رڪاوٽون ختم ڪري رهيا آهيون، رڪاوٽن جي ڪري ان کي فروغ نه ٿو ملي. هن چيو ته سيالڪوٽ – کاريان موٽروي جي تعمير سان سفر 100 ڪلوميٽر گهٽ ٿي ويندو، ان سان اضافي ٻارڻ ۽ گاڏين جي مرمت جي مد ۾ خرچ ٿيندڙ رقم جي پڻ بچت ٿيندي ڇو ته اسان پيٽروليم مصنوعات درآمد ڪريون ٿا ۽ ان تي قيمتي پرڏيهي ناڻو خرچ ٿئي ٿو. وزيراعظم چيو ته موٽروي تي ٽريفڪ جو دٻاءُ وڌيڪ هوندو آهي، ماضي ۾ جيڪي موٽرويز ٺاهيون ويون انهن جو ملڪ کي وڌيڪ فائدو نه ٿيو، هتي موٽروي اڳ ۾ ٺهڻ گهرجي ها، ٻئي طرف رستن کي ٻن ڦاڪن وارو به ڪري سگهجيو پئي، ان سلسلي ۾ ٿيندڙ هيستائين جي نقصان جو اندازو به لڳائڻ گهرجي، ٻن سالن ۾ سيالڪوٽ – کاريان موٽروي مڪمل ٿي ويندي، اهو هڪ فعال منصوبو آهي، ان سان پئسي جي به بچت ٿيندي ۽ اهي علائقا ترقي ڪندا ۽ صنعتن کي به موٽروي سان ڳنڍيو ويندو. وزيراعظم چيو ته پبلڪ پرائيويٽ پارٽنرشپ سان ترقياتي فنڊز جي بچت ٿيندي ۽ سرڪاري ترقياتي فنڊز ٻين ترقياتي منصوبن جي لاءِ استعمال ڪري سگهبا. هن چيو ته چٽاڀيٽي واڪ جو نظام شروع ڪرڻ جي ڪري 26 سيڪڙو قومي ناڻي جي بچت ٿي آهي، اهو به هڪ تمام مثبت قدم آهي، جيڪو به منصوبو لڳڻ گهرجي ان بابت اڳ ۾ سوچڻ گهرجي ته ان سان ملڪ کي ڪيترو فائدو ٿيندو. وزيراعظم چيو ته خيبرپختونخواهه ۾ سوات موٽروي جو منصوبو تمام ڪامياب رهيو آهي ۽ ان تي اسان جي حڪومت کي فخر آهي، عيد جي موڪلن دوران سياحت جي لاءِ ويندڙن جو انگ وڌڻ جي ڪري 27 لک گاڏين ان موٽروي تي سفر ڪيو، ان سان معاشي آمدني به وڌي آهي، اسان جي ملڪ جي 22 ڪروڙ آبادي آهي، ان کي اسان پنهنجي فائدي جي لاءِ به استعمال ڪري سگهون ٿا ۽ ان آبادي کي بار نه بڻجڻ گهرجي، سرڪاري ۽ نجي حصيداري تحت رستن جي تعمير جي لاءِ سيڙپڪاري تڏهن ايندي آهي جڏهن ٽريفڪ جو دٻاءُ وڌيڪ هجي. هن چيو ته سياحت تمام وڏو شعبو آهي جنهن تي ماضي ۾ ڌيان نه ڏنو ويو، سوات موٽروي کان دير چترال ۽ گلگت تائين موٽروي ٺهڻ سان سياحت کي فروغ ملندو، ٻاهرئين ملڪ مان به سياح ايندا ۽ آمدني ۾ به اضافو ٿيندو، اسان جو سڀ کان وڏو مسئلو اهو اهي ته اسان روانگي واپار ۾ اضافي تي ماضي ۾ ڌيان نه ڏنو، آمدني واپار وڌڻ جي ڪري مسئلا پيدا ٿين ٿا، آمدني ۾ اضافي جي لاءِ سياحت ۽ صنعتي ترقي تي ڌيان ڏيڻو پوندو ۽ ٻاهرئين ملڪ رهندڙ پاڪستانين پاران به سيڙپڪاري وڌائڻي پوندي، جيستائين اسان جو روانگي واپار نه وڌندو ان وقت تائين اسان انهن شعبن جي ترقي سان ڊالر جي کوٽ کي پورو ڪري سگهون ٿا. وزيراعظم چيو ته اين ايڇ اي تمام ٿوري وقت ۾ تمام گهڻو ڪم ڪيو آهي، اڳوڻا حڪمران رستا ٺاهڻ جي دعويٰ ڪندا هئا ۽ انهن تي ووٽ وٺندا هئا، انهن کان اسان ٽيڻ تي وڌيڪ رستا ٺاهي چڪا آهيون ۽ اهي سستا به ٺاهيا ويا آهن، ماضي جي حڪمرانن وانگر رستن جي ڪميشن سان لنڊن ۾ فليٽس خريد نه ڪيا ويندا، موجوده حڪومت جي موٽرويز ۽ رستن جي منصوبن بابت ماڻهن کي ٻڌائڻ گهرجي. وزيراعظم پبلڪ پرائيويٽ پارٽنرشپ تحت سيالڪوٽ – کاريان موٽروي منصوبو شروع ڪرڻ تي مواصلات واري وفاقي وزير مراد سعيد ۽ اين ايڇ اي جي عملدارن کي خراج تحسين پيش ڪيو.

مضمون کا ماخذ : apostas lotomania

متعلقہ مضامین