ڪراچي خوشحال هوندو آهي ته پورو پاڪستان خوشحال هوندو آهي: وزيراعظم

APP69-101221 KARACHI: December 10 - Prime Minister Imran Khan addressing to the inauguration ceremony of Green Line Bus Rapid Transit (BRTS) project. APP Photo by Abbas Mehdi

ڪراچي – 10 ڊسمبر (اي پي پي) وزيراعظم عمران خان ڪراچي کي ملڪ جي ترقي جو محور قرار ڏيندي چيو آهي ته ڪراچي خوشحال هوندو آهي ته پورو پاڪستان خوشحال هوندو آهي، ملڪ کي سڀ کان وڌيڪ روينيو ڏيندڙ شهر جي عوام جي مسئلن جي حل لاءِ پرعزم آهيون، ڪراچي ٽرانسفارميشن پلان تحت واعدن تي عمل جاري آهي، بنڊ آئي لينڊ مان سنڌ کي فائدو ٿيندو، عوامي مفادن لاءِ منصوبن ۾ هڪٻئي سان تعاون ۽ گڏجي هلڻ سان سڀني جو فائدو ٿيندو، موجوده حڪومت عوام کي سهولتون فراهم ڪرڻ لاءِ اهي ڪم ڪيا جيڪي ترقي يافته ملڪن ۾ به نٿا ڪيا وڃن. اهڙن خيالن جو اظهار هن ڪراچي جي شهرين لاءِ جديد ترين سفري سهولتون رکندڙ 35.5 ارب روپين جي لاڳت سان گرين لائين بس ريپڊ ٽرانزٽ سسٽم منصوبي جو افتتاح ڪندي ڪيو. ان موقعي تي سنڌ جو گورنر عمران اسماعيل، منصوبابندي، ترقي ۽ سڌارن وارو وفاقي وزير اسد عمر، اطلاعات ۽ نشريات وارو وفاقي وزير چوڌري فواد حسين، آءِ ٽي وارو وفاقي وزير امين الحق، سنڌ اسيمبلي ۾ مخالف ڌر اڳواڻ حليم عادل شيخ، پارليامينٽ جا ميمبر ۽ اعليٰ عملدار به موجود هئا. وزيراعظم عمران خان منصوبي جي تڪميل تي سنڌ جي گورنر عمران اسماعيل ۽ وفاقي وزير اسد عمر کي مبارڪباد ڏيندي چيو ته هر شهر جي لاءِ جديد ٽرانسپورٽ ضروري هوندي آهي، ڪراچي پاڪستان جي ترقي جو محور آهي، ڪراچي خوشحال هوندو آهي ته پورو پاڪستان خوشحال هوندو آهي، سڀني کان وڌيڪ روينيو ڪراچي مان حاصل ٿيندو آهي، هن چيو ته ماضي ۾ ڪراچي جي ٽرانسپورٽ جي نظام تي ڌيان نه ڏنو ويو، هاڻي گرين لائين بس سروس جي افتتاح سان جديد ٽرانسپورٽ جو نظام شروع ڪيو پيو وڃي، هن چيو ته ڪراچي روشنين جو شهر هو، ان کي کنڊر بڻجي ڏٺو آهي ڇو ته ماضي ۾ ان جي مينيجمينٽ سسٽم تي ڌيان نه ڏنو ويو. هن چيو ته ايران تي پابندين جي باوجود گادي وارو شهر تهران جدد شهر آهي ڇو ته ان جي مينيجمينٽ جديد بنيادن تي هموار ڪئي وئي آهي، اتي پاڻي ۽ سيوريج جون جديد سهولتون دستياب آهن ڇو ته ان شهر جو پنهنجو روينيو گڏ ٿيندو آهي ۽ انهي تي خرچ ڪيو ويندو آهي، هن چيو ته ڪراچي کي بدانتظامي جي ڪري مسئلا درپيش آهن، ڪراچي کي بلدياتي چونڊن جي ذريعي خودمختياري ڏيڻ جي ضرورت آهي جهڙي طرح پنجاب ۽ خيبرپختونخوا جي وڏن شهرن ۾ ميئر سڌو سنئون چونڊيو ويندو آهي، وزيراعظم چيو ته ڪراچي ٽرانسفارميشن پلان تحت واعدن تي عم جاري آهي، ڪراچي ۾ پاڻي جو وڏو مسئلو آهي، ڪي فور منصوبو ان لحاظ کان اهم آهي، ايندڙ مهيني ان منصوبي جو سنگ بنياد رکڻ جي تقريب ٿيندي، 2023ع ۾ اهو منصوبو مڪمل ٿيندو، ڪينجهر ڍنڍ مان ڪراچي جي شهرين کي پاڻي فراهم ڪيو ويندو، ان منصوبي تي ڀرپور ڌيان آهي، هن چيو ته موجوده حڪومت عوام کي سهولتونف راهم ڪرڻ لاءِ اهو ڪم ڪيو جيڪو ترقي يافته ملڪن ۾ به نه ڪيا ويندا آهن، ماڻهن کي هيلٿ ڪارڊ جي ذريعي هيلٿ انشورنس فراهم ڪئي وئي ڇو ته هڪ بيماري جي ڪري پورو گهر قرضي ٿي ويندو آهي ۽ غربت کان هيٺ اچي ويندو آهي، هن چيو ته خيبرپختونخوا ۾ سڀني خاندانن کي هيلٿ انشورنس ڪارڊ ڏنا ويا آهن جڏهن ته جنوري کان مارچ جي دوران سڄي پنجاب ۾ سمورن خاندانن کي هيلٿ انشورنس فراهم ڪئي ويندي، بلوچستان صوبو، گلگت بلتستان ۽ آزاد ڪشمير پنهنجي شهرين کي هيلٿ ڪارڊ ڏيڻ لاءِ تيار آهن، سنڌ حڪومت کي به پنهنجي صوبي جي عوام جي مفاد ۾ انهن کي هيلٿ ڪارڊ ڏيڻ گهرجن. عمران خان چيو ته سنڌ حڪومت بنڊل آئي لينڊ جو اين او سي ڏئي واپس وٺي ڇڏيو، ان منصوبي جو سڀ کان وڌيڪ فائدو سنڌ صوبي کي ٿيندو، ان کي روينيو ملندو ۽ ڪراچي جديد شهر بڻجندو، ان منصوبي سان وفاقي حڪومت کي صرف پرڏيهي ناڻو ملندو باقي سڀ فائدو سنڌ کي پهچندو، هن چيو ته شهرن جي غير منظم پکيڙ سان مسئلا پيدا ٿيندا آهن، آبادي تيزي سان وڌي رهي آهي جنهن جي لاءِ منصوبابندي سان جديد شهر ٺاهڻا پوندا، جيڪڏهن شهرن جي بي پناهه پکيڙ جاري رهي ته زرعي زمين ۾ گهٽتائي سان فوڊ سيڪيورٽي جو مسئلو پيدا ٿي سگهي ٿو، هن چيو ته لاهور ۾ راوي سٽي جو جديد منصوبو آباد ڪيو پيو وڃي، ان ۾ وڻ لڳايا پيا وڃن، ماحول جو خاص خيال رکي رهيا آهيون، لاهور ۽ ڪراچي ۾ آلودگي جو وڏو مسئلو آهي، جديد شهر آباد ڪرڻ سان شهرين کي جديد سهولتن جي فراهمي ۾ مدد مندي، هن چيو ته سنڌ جا ماڻهو به پاڪستان جو حصو آهن، سنڌ ۾ اٽو 250 روپيا في مڻ مهانگو ملي رهيو آهي، اسان کي گڏجي ڪم ڪرڻ گهرجي، هڪٻئي سان تعاون ۽ گڏجي هلنداسين ته سڀني کي فائدو ٿيندو. تقريب کي سنڌ جي گورنر عمران اسماعيل، منصوبابندي واري وفاقي وزير اسد عمر به خطاب ڪيو، ان کان اڳ وزيراعظم عمران خان تختي جي نقاب ڪشائي ڪري گرين لائين بس ريپڊ ٽرانزٽ سسٽم منصوبي جو افتتاح ڪيو. اهو منصوبو وفاقي حڪومت پاران سنڌ جي عوام خاص طور تي ڪراچي واسين لاءِ هڪ قيمتي تحفو آهي، جنهن سان اولهندي ۽ وچ وارن ضلعن جا 135000 مسافرن کي روزاني جديد ترين سفري سهولتن سان گڏ سينٽرل بزنس ڊسٽرڪٽ تائين پهچ آسان ۽ محفوظ بڻجي سگهندي. 21 ڪلوميٽر ڊگهي گرين لائين بس ريپڊ ٽرانزٽ سسٽم ڪوري ڊور تي 22 اسٽيشنز، ٽڪيٽ رومز، برقي لفٽ ۽ سيڙهيون موجود آهن، جتي بجلي جي بنا رنڊڪ فراهمي کي يقيني بڻائڻ لاءِ بيڪ اپ جنريٽرز جي سهولت موجود آهي، گرين لائين بس سروس ۾ مرد، عورتن ۽ بزرگن لاءِ ڌار دروازا مختص آهن، بس جي ٻنهي پاسن کان دروازا لڳايا ويا آهن پهريون دروازو عورتن جي لاءِ، ٻيو فيملي ۽ ٽيون مردن ۽ ڇوڪرن لاءِ مخصوص ڪيو ويو آهي، هر بس ۾ معذور ماڻهن لاءِ بورڊنگ برج ۽ ويهڻ جو خصوصي انتظام آهي، 150 مسافرن جي گنجائش سان 18 ميٽر ڊگهي 80 ڊيزل هائبرڊ ۽ ايئر ڪنڊيشنڊ بس سروس سرجاني کان ميونپسل پارڪ تائين 22 ڪلوميٽر جو فاصلو طئي ڪندي، هر بس ۾ معلومات ۽ تشهير جي لاءِ ڊجيٽل اسڪرينز، سي سي ٽي وي ڪئميرا به لڳاي ويا آهن جڏهن ته بس اسٽيشن تي موجود سهولتن ۾ ايڪسيليٽرز، لفٽ سروس شامل آهن. ان کانسواءِ مسافرن جي سهولت لاءِ ٽڪيٽ وينڊنگ مشينز به لڳايون ويون آهن بس ۾ سيل فون چارجنگ پورٽ جي سهولت به موجود آهي ۽ فائر اينڊ سيفٽي ايڪوپمينٽ به لڳايا ويو.

مضمون کا ماخذ : میگا فارچیون

متعلقہ مضامین